Tvö ár frá komu sýrlensks kvótaflóttafólks í Húnaþing vestra

Nú eru liðin tvö ár frá því að fimm sýrlenskar fjölskyldur fluttu í Húnaþing vestra með samningi við félags- og barnamálaráðuneytið um mótttöku kvótaflóttafólks. Þessi tvö ár hafa verið gefandi og lærdómsrík fyrir allt samfélagið.

Mótttaka flóttamanna var leidd af Húnaþingi vestra í samvinnu við Rauða krossinn og stuðningsfjölskyldur á þeirra vegum. Samfélagið allt er einnig búinn að vera virkur þátttakandi í verkefninu frá upphafi. Því er óhætt að segja að það hafi verið sterkur hópur sem vann þétt saman í þessu verkefni. Aðlögun fólksins hefur gengið vel og eru þau virkir þátttakendur í samfélaginu. Öllum þeim sem hafa komið að móttökunni sl. tvö ár eru færðar miklar þakkir fyrir framlag þeirra.

Í tilefni þess að verkefninu er nú formlega að ljúka var efnt til hófs í Félagsheimilinu Hvammstanga þar sem sýrlenskri og íslenskri menningu var teflt saman. Þar var sungið, dansað, drukkið sýrlenskt kaffi og te og smakkaður sýrlenskur matur. Gestir gátu fengið nafnið sitt ritað á sýrlensku ásamt því að máta sýrlenskan fatnað.

Hér má sjá nokkrar myndir frá móttökunni.