Fundað með þingnefnd og ráðherra

Þorleifur Karl Eggertsson oddviti, Magnús Magnússon formaður byggðarráðs og Unnur Valborg Hilmarsdóttir sveitarstjóri fóru til fundar við umhverfis- og samgöngunefnd Alþingis á dögunum. Nefndin boðaði fulltrúa sveitarfélagsins til fundar til að fylgja eftir umsögn þess um frumvarp til breytingar á skipulagslögum. Nær breytingin til svokallaðs raflínuskipulags. Sveitarfélagið lagðist í umsögn sinni gegn fyrirhuguðum breytingum þar sem með þeim er gengið á skipulagsrétt sveitarfélaga. Umsögnin var færð til bókar á 1153. fundi byggðarráðs. Sjá hér.

Í sömu ferð var innviðaráðherra sóttur heim í ráðuneytið. Á fundinum voru ýmis mál rædd. Aðallega samgöngumál og bar Vatnsnesveginn þar á góma eins og jafnan í samtölum við ráðamenn um framfaramál í sveitarfélaginu.  Ítrekuð var sú áhersla sveitarfélagsins að ýta framkvæmdum við veginn framar á samgönguáætlun. Vinna við uppfærslu gildandi áætlunar stendur nú yfir og því afar brýnt að halda þessu baráttumáli á lofti í þeirri vinnu.