Fræðsluráð

Lagt fram erindi frá skólastjóra Grunnskóla Húnaþings vestra um breytingu á Reglum um heimadaga frá 2013. Breytingatillögurnar snúa að því að aðeins verði hægt sé að sækja um heimadaga frá 1. nóvember til og með 1. apríl ár hvert og að heimadagur verði ekki alltaf sami vikudagurinn. Fræðsluráð bendir á að mikilvægt er að taka tillit til lotubundinna þátta s.s. árshátíðarundirbúnings og danskennslu ef veittir eru heimadagar. Fræðsluráð er sammála tillögu skólastjóra og leggur til við byggðarráð að samþykkja hana.

Sviðsstjóri fjölskyldusviðs greindi frá vinnu vegna verkefnisins "Fræðslustjóri að láni". Verið er að mynda stýrihóp starfsmanna og könnun um vilja starfsmanna um endurmenntun verður send út í kjölfarið.

Lagt fram erindisbréf stýrihóps um innleiðingu barnvæns- og heilsueflandi sveitarfélags í Húnaþingi vestra. Fræðsluráð samþykkir að Guðmundur Ísfeld verður fulltrúi fræðsluráðs í stýrihópnum.

Fundargerðir farsældarteymis lagðar fram til kynningar.

Íþrótta- og tómstundafulltrúi fór yfir helstu atriði í starfsáætlunum íþróttamiðstöðvar og félagsmiðstöðvar fyrir árið 2024. Fræðsluráð þakkar Tönju fyrir greinargóða yfirferð.

Fræðsluráð skoðaði Íþróttamiðstöð Húnaþings vestra og kynnti sér nýafstaðnar endurbætur og áherslur í starfsemi.