Opnunartími leikskóla og grunnskóla í kjölfar kjarasamninga

Fræðsluráð leggur til við Byggðarráð að skipa starfshóp til að fara yfir þessar áskoranir og mögulegar lausnir í samvinnu við starfsmenn, foreldra og atvinnurekendur í Húnaþingi vestra.

Byggðarráð samþykkir framlagt erindisbréf. Í hópnum munu sitja: Formaður fræðsluráðs sem jafnframt er formaður hópsins, fulltrúi minnihluta í sveitarstjórn, skólastjórar grunn- og leikskóla, fulltrúar foreldrafélaga í grunn- og leikskóla og fulltrúi úr atvinnulífinu í Húnaþingi vestra. Sveitarstjóra er falið að kalla eftir tilnefningum frá foreldrafélögum grunn- og leikskóla ásamt fulltrúa atvinnulífs.

Lögð fram eftirfarandi tillaga:

„Sveitarstjórn samþykkir erindisbréf starfshóps um opnunartíma leikskóla og grunnskóla eftir gerð kjarasamninga og skipan eftirtalinna í hópinn:
Elín Lilja Gunnarsdóttir, formaður fræðsluráðs sem jafnframt er formaður hópsins.
Eygló Hrund Guðmundsdóttir, fulltrúi minnihluta í sveitarstjórn.
Kristinn Arnar Benjamínsson, leikskólastjóri Leikskólans Ásgarðs.
Eydís Bára Jóhannsdóttir, skólastjóri Grunnskóla Húnaþings vestra.
Þórunn Ýr Elíasdóttir, kaupfélagsstjóri fyrir hönd atvinnurekenda.
Rannvá Björk Þorleifsdóttir, fyrir hönd foreldra í leikskóla.
Hjördís Bára Sigurðardóttir, fyrir hönd foreldra í grunnskóla.“

Tillagan borin undir atkvæði og samþykkt með 6 atkvæðum.

Farið yfir erindisbréf hópsins og forsendur ræddar. Kjarasamningsumhverfi starfsmanna sveitarfélagsins er með þeim hætti frá 1. nóvember 2024 að full vinnuvika er 36 stundir sem veldur mönnunarvanda.
Ákveðið að kanna hug atvinnurekenda, íbúa og foreldra til þeirrar tillögu að leikskóli og frístund loki t.d. kl. 14:00 á föstudögum og/eða stytta hvern dag um 30 mín. Einnig verði kallað eftir öðrum tillögum. Það verði gert á íbúafundi og með opnu samráði. Sviðsstjóra fjölskyldusviðs falið að gera drög að kynningu fyrir næsta fund. Lagt til að halda íbúafund í febrúar 2025 um málið.

Lögð fram drög að kynningu fyrir íbúafund þann 18. febrúar. Kynning og fyrirkomulag fundarins samþykkt.